Նոյեմբերի 27-ին Մոսկվայում տեղի ունեցավ «Ախթամար» կարճամետրաժ ֆիլմի պրեմիերան` ռեժիսորներ Լյուդվիգ եւ Պոլ Շամասյան եղբայրների «Լեգենդն այսօր» ֆիլմաշարից: Այս ֆիլմի սցենարի հիմքում Աղթամար կղզու արքայադստեր լեգենդն է: Լեգենդը պատմում է ֆիլմի գլխավոր հերոս տաքսու վարորդը` իրեն անծանոթ ուղեւորին: Վարորդի դերակատարն է ԽՍՀՄ ժողովրդական արտիստ Արմեն Ջիգարխանյանը :

Ֆիլմում հնչում է Սթիվ Հիլթոնի երաժշտությունը, իսկ դուդուկ նվագում է Ջիվան Գասպարյանը:

«Լեգենդն այսօր» ֆիլմաշարից կցուցադրվեն լեգենդ Արա Գեղեցիկի մասին, Սանատրուկ թագավորի մասին, որն իր ողջ կարողությունը ծախսել է երկրաշարժից տուժած Մծբին քաղաքի վերականգնման համար, եւ այլ լեգենդների հիման վրա ստեղծված ֆիլմերը:

Հունվարի 1-ից ֆիլմը ցանկացողները կարող են դիտել www.ararat-legends.com. կայքէջում: