«Այս տարի արտահանման ծավալները կտրուկ աճեցին գյուղատնտեսության բոլոր ուղղություններով»,- դեկտեմբերի 8-ին կայացած մամլո ասուլիսում հայտնեց գյուղատնտեսության փոխնախարար Սամվել Գալստյանը: Նրա խոսքով, այս տարի արտահանվել է 13 հազար 757 տոննա ծիրան, ինչը մոտավորապես երկու անգամ շատ է անցյալ տարվա ցուցանիշից` 7517 տոննա: Արտահանվել է 697 տոննա բալ եւ 990 տոննա դեղձ:

Սամվել Գալստյանը նշեց, որ Ռուսաստանի հետ արդեն համաձայնագիր է ստորագրվել 3 հազար 400 տոննա խաղողը անցյալ տարվա համեմատ 1.5 անգամ թանկ գնով մատակարարելու մասին:

Այս տարի 205 հազար տոննա խաղողի բերք է ստացվել, ինչը 20 հազար տոննայով շատ է անցյալ տարվա ցուցանիշից: Իրացման հետ կապված խնդիրների պատճառով գյուղացիները խուճապի էին մատնվել: Սակայն, ինչպես նշեց փոխնախարարը, պետական կառույցների կողմից նախաձեռնված միջոցների շնորհիվ, ոչ մի կիլոգրամ խաղող առանց գնորդի չմնաց:

Մեկ կիլոգրամ խաղողի միջին գինը կազմում է 115.4 դրամ, իսկ գինու-օղու արտադրության գործարանները խաղողը գնելու են 130 դրամ պայմանագրային գնով: Առանց նախնական պայմամավորվածության խաղողը կհաջողվի իրացնել 70-130 դրամ գնով` կախված խաղողի տեսակիվ եւ նրա որակական հատկանիշներից: