«Որքան էլ տարօրինակ է, Թուրքիան իր արտաքին քաղաքականությամբ արեց ամեն ինչ, որպեսզի ողջ աշխարհի ուշադրությունը դարձնի ԱՄՆ Ներկայացուցիչների պալատի արտաքին հարաբերությունների կոմիտեում Հայոց ցեղասպանության մասին բանաձեւի ընդունման գործընթացի վրա»,- այսօր Երեւանում կայացած մամլո ասուլիսում հայտնեց Հայաստանի Դեմոկրատական կուսակցության նախագահ Արամ Սարգսյանը:
Սարգսյանի խոսքով, թուրքական կողմի հայտարարություններն ու գործողությունները բոլորովին չեն համընկնում միմյանց հետ: «Այս ենթատեքստում Թուրքիայի` ավելի վաղ հայտրարաված «հարեւանների հետ զրոյական խնդիրների» քաղաքականությունը ոչ այլ ինչ է, քան հասարակ ցանկություն: Քանի որ եթե Թուրքիան չի ցանկանում ճանաչել Հայոց ցեղասպանությունը, ապա ինչպե՞ս է մտադիր Հայաստանի հետ զրոյական խնդիրներ ունենալ»,- նկատեց նա:
Հայ-թուրքական մերձեցման ներկայիս գործընթացի առնչությամբ Հայաստանի Դեմոկրատական կուսակցության նախագահը նկատեց, որ եթե անգամ ԱՄՆ ճնշման ներքո Թուրքիան վավերացնի ստորագրված հայ-թուրքական Արձանագրությունները, ապա նա դա կանի` ելնելով քաղաքական իրադրությունից:
Սարգսյանը նաեւ համոզմունք հայտնեց, որ եթե անգամ 252 բանաձեւը ներառվի Կոնգրեսի նիստերի օրակարգում, այն միանշանակ չի անցնի: «ԱՄՆ-ն այն պարզապես օգտագործում է Թուրքիայի վրա ճնշում գործադրելու համար»,- ընդգծեց նա:
Անդրադառնալով ղարաբաղյան ճակատում Ադրբեջանի հետ ռազմական գործողությունների հավանական վերսկսմանը` Դեմոկրատական կուսակցության ղեկավարը նկատեց, որ Ադրբեջանը ռազմական արկածախնդրության կդիմի միայն այն դեպքում, եթե վստահ լինի, որ այդ հարցում բացի Թուրքիայից իրեն կօժանդակեն նաեւ Միացյալ Նահանգները:
Շոշափելով Հայաստանի ներքին քաղաքականության թեման` Արամ Սարգսյանն ընդգծեց, որ ոչ մի հիմք չի տեսնում Հայաստանում արտահերթ նախագահական եւ խորհրդարանական ընտրությունների անցկացման համար (ինչի մասին ավելի վաղ հայտարարել էր Հայ ազգային կոնգրեսը (ՀԱԿ)), քանի որ ՀԱԿ-ը երկրի բնակչության աջակցությունը չի վայելում: «Այժմ հայ հասարակայնությանը նոր ընդդիմություն է հարկավոր նոր գաղափարներով, որի ձեւավորման մեջ մենք կներդնենք մեր ավանդը»,- հայտնեց նա:
