Երեւանի պետական համալսարանի ռեկտոր Արամ Սիմոնյանը հանդիպել է Հալեպի պետական համալսարանի նախագահ Նիդալ Շհադեին:
Հանդիպման ընթացքում քննարկվել են Հալեպի համալսարանին կից լեզվա•իտական կենտրոնում հայոց լեզվի ուսուցման ամբիոնի բացմանն առնչվող խնդիրներ: Պայմանավորվածություն է ձեռք բերվել, որ 2010 թվականի սեպտեմբերի 1-ից կենտրոնում կսկսվեն հայոց լեզվի ուսուցման դասընթացները ինչպես արաբների, այնպես էլ սիրիահայերի համար:
ԵՊՀ ռեկտորը պատրաստակամություն է հայտնել Հալեպ գործուղել հայոց լեզվի դասախոս, կենտրոնին ապահովել նաեւ ուսումնական նյութերով, գրականությամբ ու համակարգիչներով: Նիդալ Շհադեն տեղեկացրել է, որ հայոց լեզվի ուսուցման լսարանն արդեն կահավորված է եւ պատրաստ՝ ուսումնական գործընթացին:
Կողմերը քննարկել են նաեւ ապագայում Հալեպի համալսարանում հայագիտության ամբիոնի բացման հնարավորությունները: Հանդիպմանը մասնակցել են Հալեպում Հայաստանի գլխավոր հյուպատոս Աշոտ Մանուկյանը եւ Սիրիայի Հայ ավետարանական համայնքի համայնքապետ Հարություն Սելիմյանը, տեղեկացնում է ՀՀ ԱԳ նախարարության մամլո ծառայությունը։