Ամենայն Հայոց Կաթողիկոս Գարեգին Երկրորդը ապրիլի 26-ին Բաքվի կենտրոնում գտնվող հայկական եկեղեցի այցելեց: Ներկայումս Բաքվի հայկական եկեղեցին չի գործում և մտնում է Ադրբեջանի մշակութային հուշարձանների ցուցակի մեջ:
Անվտանգության նկատառումներով եկեղեցուն կից տարածքը շրջապատվել էր ոստիկանությամբ: Գարեգին II-ը հայկական եկեղեցի այցելեց Մոսկովյան և Համայն Ռուսիո Պատրիարք Կիրիլլի հետ, հաղորդում է "Նովոստի-Ազերբայջանը":
Ամենայն Հայոց Կաթողիկոսը մասնակցում է աշխարհի կրոնական առաջնորդների գագաթաժողովին, որը երկուշաբթի օրվանից մեկնարկել է Բաքվում:
Հայկական Սուրբ Գրիգոր Լուսավորիչ եկեղեցին կառուցվել է 1903 թվականին: 1990 թվականին Բաքվի ջարդերի ժամանակ եկեղեցուց իջեցվեց խաչը, իսկ եկեղեցին ապականվեց ու փակվեց: Ներկայումս ենթադրվում է այդ եկեղեցում տեղակայել Ադրբեջանի նախագահի աշխատակազմի գործերով Վարչության գրադարանը:
