Բելգիայի կառավարությունը դրամաշնորհային ծրագրի շրջանակներում հաստատել է Հայաստանում ցիկլոտրոնի կառուցման սուբսիդավորման չափը, հունիսի 9-ին Երևանում լրագրողներին հայտնել է Հայաստանի Ազգային մրցունակության հիմնադրամի գործադիր տնօրեն Բեկոր Փափազյանը: Նրա խոսքերով, ռադիոիզոտոպների արտադրության գերազանցության կենտրոնի ստեղծման ծրագիրը կազմում է 7-8 մլն եվրո, որից 5 մլն եվրոն ցիկլոտրոնի արժողությունն է, իսկ 2-3 մլն ուղորդվելու է Երևանի Ֆիզիկայի ինստիտուտի տարածքում շինարարական աշխատանքներին և մասնագետների վերապատրաստմանը: Ինչպես ասել է ՀԱՄՀ տնօրենը, վարկային միջոցները տրամադրել է բելգիական բանկը, իսկ Բելգիայի կառավարությունը սպասարկելու է այն, ավելացնելով, որ վարկը Հայաստանին տրամադրվում է 13 տարով 3 տարի արտոնյալ ժամկետով: Փափազյանն ասաց նաև, որ նախնական հաշվարկներով ցիկլոտրոնը գործարկվելու է 2012-ին, ինչը թույլ կտա Հայաստանին տարածաշրջանում առաջատար դառնալ ռադիոիզոտոպների արտադրության և արտահանման ոլորտում: «Նման ցիկլոտրոններ կան նաև Մոսկվայում, Թեհրանում, Ստամբուլում, սակայն այդ իզոտոպները կարճ կյանք ունեն»,- նշել է նա:

Միաժամանակ, նրա խոսքերով, գործելու է ապահովագրության զարգացման ծրագիր առողջապահության ոլորտում, «որպեսզի ամենաթանկ ծառայությունները մատչելի լինեն մեր բնակչությանը»: McKinsey միջազգային ընկերության աջակցությամբ մշակվում է բիզնես պլան, որի հիման վրա ներդրողներին ներկայացվելու են այդ իզոտոպների պոտենցիալ սպառողները, այդ թվում` ախտորոշիչ կլինիկաները: