Երևանում բացվել է Այվազյանական թատերական առաջին փառատոնը, որի շրջանակներում ներկայացվելու են երևանյան և մարզային թատրոնների 12 ներկայացումներ Այվազյանի ստեղծագործությունների հիման վրա: Փառատոնին մասնակցելու են նաև 4 ներկայացումներ վերջերս ստեղծված Աղասի Այվազյանի անվան թատրոնից: «Կարծում եմ, որ փառատոնը լավ ձևաչափ է հարգանքի տուրք մատուցելու համար մեծ հայ գրողին, դրամատուրգին և հուսով եմ, որ ներկայացումներն իրենց մակարդակով համապատասխանում են Այվազյանի անվանը»,- ասվում է ՀՀ նախագահ Սերժ Սարգսյանի ուղերձում, որն ընթերցել է ՀՀ մշակույթի փոխնախարար Արթուր Պողոսյանը:
Փառատոնի ժյուրիի նախագահ, Երևանի Հովհաննես Թումանյանի անվան պետական տիկնիկային թատրոնի գեղարվեստական ղեկավար Ռուբեն Բաբայանը PanARMENIAN.Net-ի թղթակցի հետ զրույցում նշել է. «Աղասի Այվազյանը տիրապետում է յուրօրինակ դրամատուրգիայի, որը պահանջում է հատուկ բանալի այն բացելու համար: Այդ բանալին գտնելը ռեժիսորների գլխավոր խնդիրն է, իսկ թե ինչպես է դա նրանց հաջողվել, ցույց կտան ներկայացումները»:
