Իրանի նավթի նախարար Սաեյդ Մասուդ Միրքազեմին ՀՀ էներգետիկայի ու բնական պաշարների նախարար Արմեն Մովսիսյանի հետ բանակցություններից հետո լրագրողների հետ հանդիպմանը հայտարարեց, որ նախատեսվում է բենզինի ու դիզելային վառելիքի խողովակաշար կառուցել դեպի Հայաստան, հայտնում է «ԻՐԻԲ նյուզ» գործակալությունը:
Ըստ Միրքազեմիի, Հայաստանն Իրանից գնում է գազ ու նավթամթերք, իսկ փոխարենը էլեկտրաէներգիա է առաքում: Իրանի նախարարն ասել է, որ այսօրվա բանակցություններն արդյունավետ են եղել և որոշվել է մոտ ապագայում իրականացնել նոր նախագծեր: Հաջորդ շաբաթ պետք է տեղի ունենա ձեռք բերված պայմանավորվածությունների մանրակրկիտ քննարկում փորձագետների մակարդակով:
Միրքազեմին նշել է, որ քանի որ Հայաստանը ելք չունի դեպի ծով, նրան ավելի շահավետ է նավթամթերք ձեռք բերել Իրանում, առավել ևս որ Իրանի հյուսիսային ու հյուսիս-արևմտյան շրջաններում նավթամշակման գործարաններ են կառուցվում: Իրանի նավթի նախարարը հյատարարել է. «Հայաստանը ջանքեր է գործադրում, բավարարելու համար իր պահանջներն Իրանի օգնությամբ և մենք կարող ենք օգնել նրան դրանում»:
