Այսօր Հայաստանի վարչապետի պաշտոնում ամենահավանական թեկնածուն Երևանի քաղաքապետ Կարեն Կարապետյանն է, մեկ այլ հնարավոր թեկնածու կարող է դառնալ ֆինանսների նախարար Վաչե Գաբրիելյանը, կարծում է ՀՀ նախկին վարչապետ Հրանտ Բագրատյանը: «Բոլորն արդեն ցանկանում են հանել Տիգրան Սարգսյանին իր պաշտոնից, քանի որ նա իր մտքերով և խոսքերով արդեն ձանձրացրել է իշխանություններին: Եթե հարմար տարբերակ լինի, ապա Սերժ Սարգսյանը կհանի ներկա վարչապետին իր պաշտոնից»,- ասել է նա:

Ինչ վերաբերվում է Կարեն Կարապետյանին Երևանի քաղաքապետ նշանակելուն, ապա Բագրատյանը կարծում է, որ «ՀայՌուսգազարդ»-ում նրա աշխատանքով հիանալու առիթներ չկան, իսկ քաղաքապետ պետք է լինի այն մարդը, որին ժողովուրդը հարգում է: «Նրա աշխատանքի տարիներին գազի ներտնտեսական սակագինը 8 դոլարից դարձել է 190 դոլար, դա ռուսական գազի արժեքը չէ, այլ ներքին ծախսերը: Ուկրաինայում այդ ծախսերը կազմում են 20 դոլար, իսկ Ռուսաստանում` 49 դոլար, այն դեպքում, որ դրանք տարածքով հսկայական պետություններ են»,- ասել է նա: «Որտե՞ղ եք տեսել, որ գազի սպառման կրճատման դեպքում երկրում ընլայնեն գազի պահեստարանները: Ընթացիկ տարում գազի թանկացումների 81 տոկոսը «ՀայՌուսգազարդի» ներքին գործոնների հետևանք է», այլ ոչ թե Ռուսաստանի կողմից թանկացումների»,- հավելել է նա: