«Անելիք Բանկ» ՓԲԸ-ն սկսում է պարզեցված կարգով ուսման վարկավորում:
Ինչպես հաղորդում է բանկի մամլո ծառայությունը, այսուհետ անհրաժեշտ փաստաթղթերի ներկայացման դեպքում ընդամենը 1 բանկային օրվա ընթացքում Բանկը որոշում է կայացնում ուսանողական վարկի տրամադրման վերաբերյալ: Վարկի հաստատման դեպքում վարկի ձևակերպումը և գումարի փոխանցումը համապատասխան ուսումնական հաստատության հաշվեհամարին իրականացվում է 1-3 բանկային օրում:
Որպես վարկառու կարող է հանդես գալ ուսանողը, եթե լրացել է նրա 18 տարին կամ ուսանողի ընտանիքի անդամը, ով ունի կայուն եկամուտ և ապահովված է աշխատանքով: Անհրաժեշտ է նաև ներկայացնել համապատասխան 2 երաշխավորություն:
Վարկը տրամադրվում է 6-12 ամիս ժամկետով, առանց գրավադրման` պայմանով, որ վարկառուն կամ 2 երաշխավորներից առնվազն մեկը անշարժ գույքի սեփականատեր կամ համասեփականատեր է:
Վարկատեսակի առավելություններից կարելի է առանձնացնել նաև այն հանգամանքը, որ վարկի վաղաժամկետ մարումը չի ենթադրում հավելյալ վճարումներ, ինչպես նաև վարկի տոկոսադրույքը այս պահի դրությամբ շուկայում առավել մատչելի է նմանատիպ վարկատեսակների մեջ:
«Մենք գիտակցում ենք, որ կրթությունը բարեկեցության հիմքն է, և այս վարկային պրոդուկտը, որը մենք շատ ենք կարևորում, միտված է ապագային»,- նշել է Անելիք Բանկ ՓԲԸ Վարչության նախագահ Սամվել Ճզմաչյանը: