2011 թվականի փետրվարի 14-ին ՀՖՖ գրասենյակում ՖԻՖԱ-ի տրանսֆերների համադրման համակարգի շրջանակներում կայացավ սեմինար-պարապմունք Հայաստանի առաջնության Բարձրագույն խմբի 8 ակումբների, ինչպես նաև «Կիլիկիա» ակումբի ՏՀՀ պատասխանատուների համար: Սեմինարը վարում էին ՏՀՀ պատասխանատուներ ՀՖՖ Միջազգային բաժնի պետ Սաթենիկ Ամիրանյանն ու միջազգային բաժնի մասնագետ Նաիրա Աբրամյանը:
Սեմինարը նվիրված էր Տրանսֆերների համադրման համակարգում տեղ գտած նոր փոփոխություններին, որոնք վերաբերում էին պրոֆեսիոնալ ֆուտբոլիստների տրանսֆերային գործընթացին և անչափահաս ֆուտբոլիստների առաջին գրանցմանն ու միջազգային տրանսֆերին, PanARMENIAN.Net-ին հաղորդեցին Ֆուտբոլի Ֆեդերացիայի մամուլի ծառայությունից: Ներկայացվեցին նաև ՖԻՖԱ-ի Ֆուտբոլիստների կարգավիճակի և տեղափոխության կանոնակարգում տեղ գտած փոփոխություններն ու լրացումները:
Սեմինարի տեսական նյութի ամփոփումից հետո ՀՖՖ Իրավաբանական և կադրերի բաժնի պետ Լուսինե Բակումյանը ներկայացրեց վերջերս կատարված կանոնադրական փոփոխությունները: