Ժողովրդական կուսակցության առաջնորդ Տիգրան Կարապետյանի կողմնակիցները հանրագիր են ներկայացրել Հայաստանի նախագահի աշխատակազմի ղեկավար Կարեն Կարապետյանին: Ըստ կուսակցության մամլո քարտուղար Մանվել Մարգարյանի, Կարեն Կարապետյանն ասել է, որ հանրագրում արծարծված են հարցեր, որոնք ոչ միայն ՀՀ նախագահի, այլ նաև ԱԺ-ի ու կառավարության իրավասությանն են վերաբերում, և նրանք համատեղ կաշխատեն հանրագրում նշված բոլոր խնդիրները վերացնելու ուղղությամբ:
Մարգարյանը PanARMENIAN.Net-ի թղթակցի հետ զրույցում հայտնել է, որ եթե մինչ փետրվարի 28-ը պահանջները չկատարվեն, կուսակցությունը կոչ կանի ժողովրդին անվստահություն հայտնել իշխանություններին և կպահանջի անցկացնել արտահերթ խորհրդարանական ու նախագահական ընտրություններ:
Այսօր Ժողովրդական կուսակցության հանրահավաքում ընդունվել է հանրագիր, որտեղ, մասնավորապես, ներկայացվել են կուսակցության հիմնական պահանջները՝ անհապաղ ազատ արձակել մարտի 1-ի գործով ձերբակալվածներին, բացառել Լեռնային Ղարաբաղի հանձնումն ու արևմտյան խաղաղապահ ուժերի տեղակայումը տարածաշրջանում, պետական մակարդակով արծարծել ջավախահայերի հարցը:
