Հայաստանի, Ադրբեջանի ու Ռուսաստանի նախագահների Սոչիում կայացած հանդիպումը հերթական հանդիպում էր, սակայն, առանձնահատուկ էր այն առումով, որ Մայնդորֆի հռչակագրից հետո կողմերը կրկին պարտավորություն ստանձնեցին զսպվածություն հանդես բերել հակամարտության գոտում: Այդ մասին Երևանում կայացած մամլո ասուլիսում հայտարարել է Կովկասի ինստիտուտի գիտական հետազոտությունների դեպարտամենտի ղեկավար Սերգեյ Մինասյանը: «Անշուշտ, ընդունված հայտարարությունը հազիվ թե տևական բնույթ կրի, սակայն, կարևոր է, քանի որ Աստանայի գագաթնաժողովից հետո պարզ չէր, թե ինչ ձևաչափով պետք է շարունակվեն բանակցությունները: Սոչիում ձևաչափը գտնվեց՝ կողմերը կշարունակեն բանակցությունները ԵԱՀԿ ՄԽ աջակցությամբ և Մոսկվայի նախաձեռնած եռակողմ հանդիպումների միջոցով»,-ասել է հայ փորձագետը:
Այնուամենայնիվ, Մինասյանի խոսքերով, Սոչիի հայտարարությունը չի կարելի դիվանագիտական հաղթանակ համարել Երևանի համար: «Բոլորը սպասում էին, որ կողմերը կպայմանավորվեն դիպուկահարներին առաջնային գծից ետ քաշելու վերաբերյալ: Սակայն Ալիևը փորձեց փրկել դեմքը և Սոչիի հանդիպման արդյունքն առավելագույնն էր, ինչ կարելի էր ստանալ այժմ Ալիևից»,-ասել է Սերգեյ Մինասյանը:
