2008թ. մարտի 1-2-ի ողբերգական իրադարձությունների հետաքննության շրջանակներում Հայաստանի հատուկ քննչական ծառայությունը կքննի Հայաստանի նախկին նախագահներ Լևոն Տեր-Պետրոսյանին ու Ռոբերտ Քոչարյանին մարտի 1-ի գործով հարցաքննելու նպատակահարմարությունը: Այդ մասին հայտարարել է Հայաստանի հատուկ քննչական ծառայության պետ Անդրանիկ Միրզոյանը: Նա հայտնել է, որ այդ գործով զբաղվող քննիչները կրկին ուսումնասիրում են այդ գործի նյութերը: Միրզոյանը, մասնավորապես, նշել է, որ այժմ քննարկվում են այդ գործով նոր վկաների հայտնաբերման ուղիները: Նա չի բացառել նաև այն, որ կհրավիրվեն նոր մասնագետներ ու փորձագետներ:

ՀՀ նախագահ Սերժ Սարգսյանը վերջերս հորդորեց երկրի իրավապաշտպան մարմիններին ակտիվացնել մարտի 1-ի գործով հետաքննությունը: