Մայիսի 17-ին Երևանի Կոմիտասի անվան կամերային երաժշտության տանը տեղի կունենա Հայ կոմպոզիտորական արվեստի փառատոնի գարնանային համերգաշարը: Այն կբացի Աշոտ Զոհրաբյանի Սոնատը թավջութակի և դաշնամուրի համար`Հայկ Բաբայանի (թավջութակ) և Արթուր Ավանեսովի (դաշնամուր) կատարմամբ: Խաչատրյան տրիոն ելույթ կունենա Վարդան Աճեմյանի Դաշնամուրային տրիոյով: Համերգի երկրորդ հատվածում Հայաստանի պետական կամերային երգչախումբը (գեղարվեստական ղեկավար և գլխավոր դիրիժոր` Ռ.Մլքեյան) կկատարի Էդգար Հովհաննիսյանի «Չորս խմբերգ» Տերյանական շարքը, Դավիթ Հալաջյանը կներկայացնի «Մեղա» ստեղծագործությունը (ըստ Գրիգոր Նարեկացու), Երվանդ Երկանյանը Միսաք Մեծարենցի բանաստեղծությունների հիման վրա գրած «Աշնան ծաղիկներ» շարքը:
Հայ կոմպոզիտորական արվեստի փառատոնի կազմակերպիչներն են Հայաստանի կոմպոզիտորների և երաժշտագետների միությունը և Հայաստանի պետական երիտասարդական նվագախումբը: Փառատոնը անց է կացվում երկրորդ անգամ, յուրաքանչյուր գարնանն ու աշնանը, և կայանում է ՀՀ նախագահ Սերժ Սարգսյանի բարձր հովանու ներքո: Փառատոնը կշարունակվի մինչև հունիսի 24-ը:
