Ընդդիմության մի քանի հազար կողմնակիցներ հավաքվել են Թբիլիսիի Ազատության հրապարակում` մասնակցելու Վրաստանի նախագահ Միխայիլ Սահակաշվիլիի հրաժարականը պահանջող ցույցին, հաղորդում է «Ինտերֆաքսը»:
Որոշ տվյալներով, հրապարակում երեքից հինգ հազար մարդ է հավաքվել: Ակցիայի կազմակերպիչը «Ազգային ժողով» կազմակերպությունն է, որի առաջնորդներից մեկը վրացական խորհրդարանի նախկին խոսնակ Նինո Բուրջանաձեն է: Ինչպես նշում է «Նովոստի-Գրուզիա»-ն, հանրահավաքի կազմակերպիչները ակցիաներ են ծրագրել մայիսի 21-ից 25-ն ընկած ժամանակահատվածում:
Ակցիայի անցկացման վայր է ժամանել վրացական ոստիկանությունը: Ցուցարարների կամ իրավապահ մարմինների աշխատակիցների կողմից որևէ խախտումների մասին չի հաղորդվել: Հայտնի է նաև, որ ընդդիմության ցույց է ընթանում Բաթումիում, ակցիային երկու հազարից ոչ պակաս մարդ է մասնակցում:
Վրաստանի նախագահը, որի հրաժարականն է պահանջում ընդդիմությունը, ակցիաների անցկացման ժամանակ պետք է այց կատարեր Հունգարիա:
