Ադրբեջանական կողմը հասարակությանը պատրաստում է Ղարաբաղում «կայծակնային պատերազմի»: Այդ մասին Երևանում մամլո ասուլիսում հայտարարել է ռազմական հոգեբան Դավիթ Ջամալյանը: «Ադրբեջանցիներին պատրաստում են արագ արդյունքի, արագ հաղթանակի, սակայն ուժերի այսօրվա հավասարակշռությունը թույլ չի տա հասնել նման արդյունքի»,- ասել է Ջամալյանը:
Ռազմական հոգեբանը նշել է, որ Ադրբեջանը հասկանում է, որ հարձակվող կողմը միշտ ավելի շատ կորուստներ է կրում: Ինչ վերաբերվում է Ադրբեջանի սպառազինվելու տեմպերին, Ջամալյանը նշել է, որ այսօր Արցախում հրամանատարները նույնիսկ կատակում են այդ թեմայով, ասելով, որ Ադրբեջանի կողմից ձեռք բերված զենքը վաղ թե ուշ կդառնա Արցախի բանակի ռազմական ավարը:
«Եթե պատերազմ սկսվի, ապա սպառազինությունները, որոնք այսօր գնում է Ադրբեջանը, կհայտնվեն Արցախի ձեռքում»,- ասել է Դավիթ Ջամալյանը, նշելով, որ դա ադրբեջանական կողմի վրա ճնշում գործադրելու լծակներից մեկն է:
