Ռոստովի երկրամասում «Ազգերի համագործակցության գավաթ» խառը մենամարտերի միջազգային առաջնության շրջանակում տիտղոսային մենամարտ է կայացել ֆրանսահայ Գոռ Հարությունյանի և ազգությամբ ճապոնացի շվեյցարական մարզիկ Ֆելիպպե Էնոմոտոյի միջև թեթև քաշային կարգում PROFC չեմպիոնի կոչման համար:
Երեք ռաունդ տևած լարված մենամարտի արդյունքում մրցավարների միաձայն որոշմամբ հաղթող է ճանաչվել Հարությունյանը, որը PROFC երկակի չեմպիոն է դարձել:
«Ես շատ ուրախ եմ, որ հաղթեցի: Աննկարագրելի դժվար էր, բայց ես ինձ լավագույնս դրսևորեցի: Ես հաղթանակս նվիրում եմ իմ ծնողներին, հայ ժողովրդին և բոլոր նրանց, ովքեր հավատում էին ինձ: Իհարկե, ես հասկանում էի, որ նա ուժեղ և արժանի հակառակորդ է, և որ մենամարտը դժվար է լինելու, բայց չէի մտածում, թե որքանով: Մենամարտի ժամանակ Ֆելիպպեն վարպետորեն խորամանկում էր, բայց ես վերահսկում էի իրադրությունը, հետևում նրա շարժումներին և սովորեցի հաշվարկել նրա քայլերը»,- մենամարտից հետո հայտնել է Հարությունյանը, հաղորդում է Miasin.ru-ն:
