Ստեփանակերտի օդանավակայանի շինարարությունը կավարտվի սեպտեմբերին, եթե դրան չխանգարեն եղանակային պայմանները: Այդ մասին PanARMENIAN.Net-ի թղթակցի հետ զրույցում հայտնել է ԼՂՀ կառավարությանն առընթեր Քաղաքացիական ավիացիայի վարչության պետ Դմիտրի Ատբաշյանը: Նա հաղորդել է, որ շարունակվում են լայնամասշտաբ շինարարական աշխատանքներն օդանավակայանի թռիչքուղու վրա և թռիչքների անվտանգության ապահովման կենտրոնում:
«Շինարարության ավարտից հետո մենք օդանավակայանի ներքին աուդիտ կկազմակերպենք»,- ասել է Ատբաշյանը:
Ավելի վաղ հայտարարվել էր, որ օդանավակայանը կբացվի ամռան կեսերին: Սակայն Ղարաբաղում որոշել են չշտապել և որակյալ աշխատանք իրականացնել: Առաջին փուլում ԼՂՀ օդակայանից թռիչքներ կիրականացվեն միայն դեպի Երևան: Դիտարկվում է չվերթների իրականացումն ԱՊՀ երկրներ, մասնավորապես` Ռուսաստան: