Լեռնային Ղարաբաղի Հանրապետության հռչակման 20-րդ տարեդարձի առթիվ պետհանձնաժողովի կողմից հաստատված միջոցառումների շրջանակներում ԼՂՀ Արտաքին գործերի նախարարության շենքում բացվել է լուսանկարային վահանակ` նվիրված ղարաբաղյան ազգային-ազատագրական շարժման արդի փուլին;
Վահանակին ներկայացված են Լեռնային Ղարաբաղի Հանրապետության /Արցախի Հանրապետության/ պետականության խորհրդանիշները, քարտեզը, համառոտ տեղեկատվություն ԼՂՀ վերաբերյալ, լուսանկարային նյութեր, որոնք պատմում են ղարաբաղյան շարժման, ի պատասխան արցախցիների խաղաղ պահանջների` Ադրբեջանի կողմից սանձազերծված պատերազմի, ադրբեջանա-ղարաբաղյան հակամարտության կարգավորման բանակցային գործընթացի, երկրամասի բնության և տեսարժան վայրերի, հետպատերազմյան կյանքի և վերաշինության գործընթացի, կյանքի տարբեր ոլորտներում ղարաբաղյան ժողովրդի ձեռքբերումների մասին և այլն:
Զբոսաշրջիկների համար նախատեսված հաոուկ անկյունում զետեղված են տեղեկատվություն` հանրապետության տարածք մուտքի և ելքի կարգի, հյուրանոցների մասին, ինչպես նաև այլ օգտակար տեղեկություններ:
Վահանակի բացումը նվիրված է Լեռնային Ղարաբաղի Հանրապետության արտաքին քաղաքական գերատեսչության ստեղծման 18-ամյակին, հայտնում է ԼՂՀ ԱԳՆ մամուլի ծառայությունը:
