Այսօր ՀՀ տրանսպորտի և կապի նախարար Մանուկ Վարդանյանը հանդիպել է բջջային կապի և ինտերնետային կապի ծառայություններ մատուցող ընկերությունների և տեղեկատվական տեխնոլոգիաների ներկայացուցիչների հետ։

Այս մասին տեղեկացնում է ՀՀ տրանսպորտի և կապի նախարարության լրատվական ծառայությունը։

Նախարարը վերջիններիս հետ քննարկել է կապի ոլորտին առնչվող մի շարք հարցեր: Երկու կողմերը կարևորել են կապի ոլորտում նախարարություն-մասնավոր հատված համագործակցությունը և պատրաստակամություն հայտնել հաճախակի կազմակերպել նման հանդիպումներ:

Մանուկ Վարդանյանը ոլորտում առկա խնդիրների լուծման համար առաջարկել է ներկայացնել կոնկրետ տարբերակներ` քննարկումներն ավելի առարկայական դարձնելու նպատակով: Նախարարը դիմել է ներկաներին` նախարարությունում կապի ոլորտում կադրերը մասնագետներով համալրելու առաջարկությամբ:

Հանդիպման ընթացքում պայմանավորվածություն է ձեռք բերվել ՀՀ տրանսպորտի և կապի նախարարին կից ստեղծել խորհրդակցական մարմին` կապի ոլորտի քաղաքականությունը մշակելու, ինչպես նաև առկա խնդիրները համատեղ լուծելու նպատակով: