Համահայկական խաղերի բասկետբոլի եզրափակչում, որը տեղի է ունեցավ «Միկա» մարզասրահում, խաղացին 2007-ին և 2009-ին այդ խաղերի հաղթող Սոչիի և Լոս Անջելեսի թիմերը: Թիմերը ողջ մրցաշարի ընթացքում աչքի ընկան գեղեցիկ և հիանալի խաղով և եզրափակչում նույնպես բոլոր ջանքերը գործադրեցին երկրպագուներին անմոռաց խաղ ցուցադրելու համար: Առաջին երկու խաղափուլերում 21:16 հաշվով առաջատար էին Սոչիի բասկետբոլիստները, երրորդ խաղափուլի վերջում հաշիվը հավասար էր` 56:56, իսկ չորրորդ խաղափուլում հավասար պայքար էր ընթանում, և հաղթողը որոշվեց լրացուցիչ ժամանակում: Լոս Անջելեսը հաղթանակ տարավ 93:86 հաշվով: Երրորդ տեղը զբաղեցրեց Գլենդելը, որը 91:87 հաշվով հաղթեց Թեհրանին: Բոլոր մրցանակակիրներին պարգևատրեց Հայաստանի նախագահ Սերժ Սարգսյանը:

Լոս Անջելեսի թիմի բասկետբոլիստ Վահրամ Ամայակյանը PanARMENIAN.Net-ի թղթակցի հետ զրույցում ասաց, որ 2007-ին Սոչիի թիմից կրած պարտությունից հետո թիմն անպայման ցանկանում էր հաղթանակ տանել: «Խաղը շատ բարդ էր, բայց, անկասկած, ուրախ եմ, որ մենք ավելի ուժեղ էինք և կարողացանք հաղթանակ տանել»,- ասաց Ամայակյանը:

Կանանց շարքում չեմպիոնի տիտղոս նվաճեց Թեհրանի թիմը, որը եզրափակչում 86:67 հաշվով հաղթեց Գլենդելին, իսկ Գյումրին զբաղեցրեց 3-րդ տեղը: