Սիրիայում լիբիական սցենարի կրկնությունը բացասաբար կազդի երկրի հայ համայնքի վրա: Այդ մասին Երևանում մամլո ասուլիսում հայտարարել է արաբագետ, Հայոց ցեղասպանության թանգարան ինստիտուտի փոխտնօրեն Սուրեն Մանուկյանը:
Նրա խոսքով, ակնհայտ է, որ հայ համայնքը Բաշար Ասադի կողմից է, քանի որ լավ է հասկանում, որ նրանից բացի ոչ ոք չի կարող ապահովել իրենց անվտանգությւոնը: Այդ առումով նա նշել է, որ նոր իշխանությունների ձևավորման դեդպքում հայ համայնքը, որն առանց այդ էլ նվազել է մինչև 100 հազար, աստիճանաբար կձուլվի, ինչպես դա պատահեց Իրաքի հայ համայնքի հետ:
Միաժամանակ, Սուրեն Մանուկյանը նշել է, որ տեսնելով, թե ինչ է տեղի ունեցել այլ արաբական երկրների նրա գործընկերների հետ, օրինակ Եգիպտոսի նախագահ Հոսնի Մուբարաքի, Ասադը երբեք հրաժարական չի տա և կպայքարի մինչև վերջ: Բացի դրանից, Սիրիայի նախագահը նույնպես աջակցում է հայերին: Մանուկյանը չի բացառել նաև երկրի գործերին ռազմական միջամտության հնարավորությունը:
Այս տարվա մարտից, երբ Սիրիայում սկսվել են զանգվածային հակակառավարական ելույթները, անվտանգության ուժերը սպանել են հարյուրավոր ցուցարարների: Բողոքի ցույցերը ճնշելու համար կիրառվում է նաև ծանր տեխնիկա և նույնիսկ հրետանի, որը տեղադրված է ռազմանավերում:
