Ադրբեջանի կողմից Ղարաբաղի դեմ ռազմական գործողություններ սկսելու համար իրավական հիմքերի վերաբերյալ ադրբեջանցի քաղաքագետ Էլման Նասիրլիի հայտարարությունները քարոզչական պատերազմի հերթական դրսևորումնէ, որը խարխլում է առանց այդ էլ փխրուն հարաբերությունները տարածաշրջանում: PanARMENIAN.Net-ի թղթակցի հետ զրույցում նման կարծիք է հայտնել ռուս քաղաքագետ Անդրեյ Արեշևը:
«Որքան շատ են նման հայտարարությունները, այնքան քիչ է հակամարտության խաղաղ կարգավորմանն ու ԵԱՀԿ ՄԽ առաջարկների ընդունմանը հասնելու հնարավորությունը»,- նշել է փորձագետը: Ավելին, Արեշևը միջնորդների կողմից Հայաստանին խաղաղության պարտադրելու վերաբերյալ ադրբեջանցի քաղաքագետի հայտարարությունները որոշ չափով տարօրինակ է համարել, «քանի որ Ադրբեջանն ինքն էլ գիտի Կազանում հանդիպման ձախողման պատճառը»: Բացի դրանից, ռուս քաղաքագետի կարծիքով, դա ապակառուցողական մոտեցում է խնդրի լուծմանը: Անդրադառնալով ռազմական գործողություններ սկսելու իրավական հիմքի մասին Նասիրլիի հայտարարություններին` Արեշևն ընդգծել է, որ ՄԱԿ-ի կանոնադրությունը պետք է դիտարկվի համալիր կերպով, այլ ոչ թե հատվածների մեջբերմամբ: «Դա բառախաղ է»,- հավելել է նա:
