Սեպտեմբերի 17-ին Չեխիայում ՀՀ դեսպան Տիգրան Սեյրանյանն այցելեց Պրահայի հայ համայնքի շաբաթօրյա դպրոցը: Այն հիմնադրվել է 1997 թվականին «Ազատություն» ռադիոկայանի հայկական ծառայության աշխատակից Արմեն Քոլոյանի կողմից և ունի շուրջ երեսուն աշակերտ: Դպրոցում դասավանդվում են հայոց լեզու և գրականություն, պատմություն, կրոնի և Հայ Առաքելական եկեղեցու պատմություն, ինչպես նաև ձեռագործություն, գեղանկարչություն և երգեցողություն:
Դեսպանը շնորհավորեց դպրոցի անձնակազմին, աշակերտներին և ծնողներին նոր ուսումնական տարվա մեկնարկի և Հայաստանի Հանրապետության անկախության 20-ամյակի կապակցությամբ:
Իր խոսքում դեսպան Սեյրանյանը կարևորեց սփյուռքահայ կրթօջախների դերն ու նշանակությունը երիտասարդ սերնդի հայեցի կրթության և դաստիարակության, հայապահպանման և համայնքների համախմբման գործում: Հայաստանի դեսպանը համառոտ ներկայացրեց Չեխիայում Հայաստանի նորաբաց դեսպանության գործունեությունը և պատրաստակամություն հայտնեց աջակցելու դպրոցի աշխատանքներին:
Հանդիպման ավարտին դեսպան Սեյրանյանը պատասխանեց ներկաների հարցերին:
