Սեպտեմբերի 21-ին Չեխիայի մայրաքաղաքի GH Gallery ցուցասրահում տեղի ունեցավ Հայաստանի Հանրապետության անկախության 20-ամյա տարեդարձին նվիրված Չեխիայի հայ նկարիչների ցուցահանդեսի բացումը: Սրահում ցուցադրվում են 14 նկարիչների շուրջ 30 աշխատանքներ:
Բացման խոսքով հանդես եկավ Չեխիայում Հայաստանի դեսպան Տիգրան Սեյրանյանը: Նա շնորհավորեց ներկաներին Հայաստանի անկախության հոբելյանի առթիվ` կարևորելով մշակույթի, մասնավորապես գեղարվեստի դերը հայ ազգի պատմության մեջ և հոգևոր կյանքում:
Այնուհետև ելույթ ունեցան Չեխիայի, Սլովակիայի եւ Հունգարիայի հայության հոգեւոր հովիվ Բարսեղ Փիլավչյանը և ցուցասրահի տնօրեն Մարիամ Ղարիբյանը:
Միջոցառմանը ներկա էին չեխ և հայ նկարիչներ, արվեստագետներ, լրագրողներ, հայ համայնքի անդամներ,այլ բարձրաստիճան հյուրեր:
Ցուցահանդեսն իր աշխատանքը կշարունակի մինչև հոկտեմբերի 7-ը: