«ԱրմենՏել» ընկերության հանրային կապերի բաժինը տեղեկացնում է, որ ընկերությունը Հայկական տուրիզմի ինստիտուտի ուսումնական համակարգչային նոր կենտրոնին սարքավորումներ և կահույք է նվիրել: Այժմ կենտրոնը հագեցած է ժամանակակից համակարգչային տեխնիկայով և ինտերնետով:
«Այս արարողությունը նվիրվում է զբոսաշրջության միջազգային օրվան, որը նշվել է այս շաբաթ: Մեր սոցիալական ծրագրերի կարգախոսն է` «Beeline հանուն պայծառ ապագայի» - նշեց «ԱրմենՏել» ընկերության գլխավոր տնօրեն Իգոր Կլիմկոն:
«Ուրախ ենք, որ մեր մասնագիտացված բուհը այդպիսի նվեր է ստանում հենց մեր մասնագիտական տոնի առթիվ: «ԱրմենՏել» -ի այս քայլը տուրիզմի ոլորտի նոր մասնագետներ պատրաստելու գործում մեծ ներդրում է», - նշեց Հայկական տուրիզմի ինստիտուտի ռեկտոր, պրոֆեսոր Ռոբերտ Մինասյանը:
Հայկական տուրիզմի ինստիտուտը` Ռուսաստանի տուրիզմի միջազգային ակադեմիայի մասնաճյուղ է և հավատարմագրված է ՌԴ կրթության և գիտության նախարարության կողմից: Հայաստանում Բուհը գործում է 2002 թվականից և հանդիսանում է Եվրոպական առաջատար դպրոցների Ասսոցիացիայի անդամ: