ԱՊՀ անդամ երկրների ՆԳՆ ղեկավարներն այսօր կհանդիպեն Հայաստանի նախագահի հետ: Այդ մասին հայտնել է ՀՀ ոստիկանապետ Ալիկ Սարգսյանը: Ըստ նրա, ներքին գործերի նախարարները կտեղեկացնեն Սերժ Սարգսյանին իրենց աշխատանքի մասին, իսկ նախագահն իր նկատառումները կհայտնի համագործակցության վերաբերյալ:
Ալիկ Սարգսյանը նշել է նաև, որ կարողացել է մարդկային, բարեկամական հարաբերություններ հաստատել իր պաշտոնակիցների հետ՝ նշելով, որ դա «բխում է մեր գործի շահերից»:
Խորհրդի նիստում կքննարկվեն ԱՊՀ մասնակից երկրների ներքին գործերի մարմինների համագործակցության համակարգումն ու կատարելագործումը: Մասնավորապես կդիտարկվի տեղեկատվական տեխնոլոգիաների կիրառմամբ հանցագործությունների դեմ պայքարի ոլորտում ԱՊՀ երկրների համագործակցության հայեցակարգը, հանցագործությունների նյութական ապացույց հանդիսացող թմրանյութերի, զենքի և զինամթերքի փոխանցման մեխանիզմների մասին արձանագրության նախագիծը, ինչպես նաև ԱՊՀ երկրներում անվանական զենքով քաղաքացիներին պարգևատրելու հետ կապված խնդիրներ:
