Հոկտեմբերի 24-28 կայանալու է Իտալիայի Տոսկանա նահանգի շաբաթը Երևանում: Այն կազմակերպել է Երևանի քաղաքապետարանի Մանկապատանեկան ստեղծագործության քաղաքային կենտրոնը և Հայաստանում Իտալիայի դեսպանությունը: Բացումը կայանալու է Մանկապատանեկան ստեղծագործության քաղաքային կենտրոնում «Էրմանո Շերվինո» դիզայն ստուդիայի հագուստների ցուցադրությամբ:
Հայտնի «Տեռե դել լեվանտե ֆիորենտինո» կազմակերպությունը կազմակերպելու է կրթական սեմինար`Հայաստանի տարածքում ագրոտուրիզմի զարգացման և տեղանքին հատուկ տիպիկ արտադրանքի արժևորման նպատակով: Մասնավորապես, կքննարկվեն տարածքային շուկայավարման ռազմավարությանը, էկոտուրիզմի զարգացմանն ու գյուղական վայրերում հյուրընկալությանն (ագրոտուրիզմ) առնչվող թեմաներ: Արվեստի Եվ ռեստավրացիայի ինստիտուտ – Պալացո Սպինելի ինստիտուտի հնագիտական գտածոների ռեստավրացիայի դասախոս Էլենա Ֆունգինին հոկտեմբերի 25-ին և 26-ին Երևանում կանցկացնի երկու սեմինար:
«Վենտի լուչենտի» ընկերակցությունը Երևանում ներկայացնելու է «Արարատ» ներկայացումը, որը պատմում է ցեղասպանության մասին և բեմադրվել է Վենետիկի հայ համայնքում:
