Նոյեմբերի 3-ին հունական Պորտո Կարրաս հանգստավայրում տեղի կունենա Եվրոպայի շախմատի առաջնության առաջին մրցափուլը:
Հայաստանի տղամարդկանց հավաքականը, որը վարկանիշում չորրորդն է, առաջին մրցափուլում կխաղա Ավստրիայի հավաքականի հետ: Ռուսաստանն իր ուժերը կչափի Մոլդովայի, Ուկրաինան` Սլովակիայի հետ:
Հայաստանի կանանց հավաքականը, որը նույնպես չորրորդն է, կհանդիպի Չեխիայի հետ, ռուս շախմատիստուհիները կմրցեն Իսրայելի, Ուկրաինան` Հունաստանի հետ:
Պարտիաները կսկսվեն երևանյան ժամանակով 17:00-ին, իսկ մրցությունների պաշտոնական բացումը տեղի կունենա առաջին մրցափուլի մեկնարկից կես ժամ առաջ:
Առաջնությունը տեղի կունենա 9 տուրից բաղկացած շվեյցարական համակարգով: Տղամարդկանց առաջնությանը մասնակցում է 38 հավաքական, կանանց առաջնությանը` 28:
Ժամանակի հսկողությունը 90 րոպե է 40 քայլի համար, այնուհետև` 30 րոպե մինչև պարտիայի ավարտը` գումարած 30 վայրկյան յուրաքանչյուր քայլի համար` սկսած առաջինից: Պարտիաները տեղի կունենան նոյեմբերի 3-ից 11-ը: