Քարվաճառը (Քելբաջար) Հայաստանի հետ կապող ճանապարհի շինարարությունն ունի ոչ միայն ռազմավարական, այլ նաև քաղաքական ու տնտեսական նշանակություն: Այդ մասին PanARMENIAN.Net-ի թղթակցի հետ զրույցում հայտարարել է ԼՂՀ նախագահի աշխատակազմի գլխավոր տեղեկատվական վարչության պետ Դավիթ Բաբայանը:
Ըստ նրա, տնտեսական տեսակետից դա դրական անդրադարձ կունենա նաև հանքավայրերի շահագործման վրա ու առավել կհեշտացնի արտահանումը Հայաստան: «Ռազմավարական տեսակետից սա ևս մեկ մայրուղի կլինի, որը կկապի Հայաստանն ու Արցախը: Դա հերթական անգամ ցույց է տալիս Քարվաճառի կարևորությունը Հայաստանի համար»,-ասել է Բաբայանը:
Անդրադառնալով այն հարցին, թե որքան միջոցներ կպահանջվեն ճանապարհի կառուցման համար՝ Դավիդ Բաբայանն ասել է, որ այդ հարցը դեռևս չի քննարկվում, սակայն, նշել է, որ կծախսվի ավելի քան մեկ միլիոն դոլար:
Նոր ճանապարհը 150 կմ ավելի կարճ կլինի, քան Բերձորով (նախկին Լաչին) անցնող այժմ գործող ճանապարհը:
