Նոյեմբերի 7-ին Հայաստանի արտգործնախարար Էդվարդ Նալբանդյանը հանդիպեց աշխատանքային այցով Երևան ժամանած իր վրացի գործընկեր Գրիգոլ Վաշաձեի հետ: Ողջունելով Վրաստանի արտաքին քաղաքական գերատեսչության ղեկավարին` ԱԳ նախարար Էդվարդ Նալբանդյանը դրական գնահատեց հայ-վրացական ակտիվ և կանոնավոր քաղաքական երկխոսությունը և նշեց, որ դա ամուր հիմք է ծառայում փոխշահավետ հարաբերությունների զարգացման համար:
Բանակցությունների ժամանակ քննարկեցին հայ-վրացական օրակարգին առնչվող հարցերի լայն շրջանակ, երկու պետությունների նախագահների միջև ձեռք բերված պայմանավորվածությունների կատարման ընթացքը:
Կողմերն անդրադարձան առաջիկա երկկողմ փոխայցելությունների ժամանակացույցին, նոյեմբերի 18-19-ին նախատեսված միջկառավարական հանձնաժողովի նիստին, հայ-վրացական քաղաքական, տնտեսական, էներգետիկ, մշակութային ինչպես նաև իրավապայմանագրային դաշտին, վիրահայությանն առնչվող հարցերին:
Հանդիպմանը երկու երկրների արտգործնախարարները կարևորեցին համագործակցության զարգացումը ինչպես միջխորհրդարանական, այնպես էլ միջգերատեսչական և ապակենտրոնացված ձևաչափերում:
Նախարարներ Նալբանդյանն ու Վաշաձեն մտքեր փոխանակեցին Մերձավոր Արևելքում տեղի ունեցող զարգացումների շուրջ: Երկու երկրների արտգործնախարարները խոսեցին Լեռնային Ղարաբաղի հիմնախնդրի կարգավորման գործընթացից: Այս առումով ընդգծվեց, որ հիմնախնդիրը պետք է լուծվի խաղաղ բանակցությունների ճանապարհով` միջազգային իրավունքի սկզբունքների հիման վրա: