Թուրքիայի արտաքին գործերի նախարար Ահմետ Դավութօղլուն կմասնակցի Թուրք-արաբական ֆորումի չորրորդ գագաթաժողովին, որը տեղի կունենա Մարոկկոյի մայրաքաղաք Ռաբատում: Դավութօղլուն Ռաբատում նաև երկկողմ հանդիպումներ կանցկացնի, հաղորդում է թուրքական TRT հեռուստաալիքը:
Նիստերի ժամանակ կընդունվի համատեղ գործունեության ծրագիր, որը Թուրքիան և Արաբական պետությունների լիգան (ԱՊԼ) կիրականացնեն մոտակա երեք տարում: Գագաթաժողովի օրակարգի հիմնական կետը կդառնա իրադրությունը Սիրիայում: Կդիտարկվեն Սիրիայի անդամակցության դադարեցման վերաբերյալ որոշման մասին Լիգայի հայտարարությանը հաջորդած իրադարձությունները:
Նոյեմբերի 12-ին Արաբական պետությունների լիգայի անդամ երկրների ԱԳ նախարարները Դամասկոսի կողմից սիրիական ճգնաժամի կարգավորման արաբական ծրագրի դրույթները խախտելու պատճառով դադարեցրել են Սիրիայի անդամակցությունը համաարաբական կազմակերպությանը: Ընդ որում, Լիգան կազմակերպության անդամներին կոչ է արել հետ կանչել իրենց դեսպաններին Դամասկոսից, ինչպես նաև սպառնացել է տնտեսական և քաղաքական պատժամիջոցներով:
