Ազգային ժողովում քննարկվող 2012 թ-ի բյուջեի նախագիծը ոչ որակական, ոչ էլ քանակական բարելավման չի բերի: Այդ մասին Երևանում մամլո ասուլիսի ժամանակ հայտարարել է Երևանի նախկին քաղաքապետ, ընդդիմադիր Հայ ազգային կոնգրեսի (ՀԱԿ) անդամ Վահագն Խաչատրյանը: «Այս բյուջեն ոչ մի հավակնություն չունի», ընդգծել է ՀԱԿ ներկայացուցիչը:
Խաչատրյանը հավելել է, որ Հայաստանը գտնվում է համակարգային խորը ճգնաժամի մեջ, թե քաղաքական, թե տնտեսական առումով, և նոր բյուջեն հնարավորություն չի տալիս այդ ճգնաժամից դուրս գալու համար:
ՀԱԿ ներկայացուցիչը թերահավատությամբ վերաբերվեց կառավարության արտահանմանը միտված արդյունաբերության զարգացման ծրագրին: «Ցանկությունների ծրագիր»,-հեգնանքով նշեց Խաչատրյանը: