Ավելի քան 2000 վեբ խանութներ, որոնք վաճառում էին կեղծ կամ գոյություն չունեցող ապրանքներ, փակվել են Լոնդոնի ոստիկանության կողմից: Ինչպես հայտնել է Լոնդոնի ոստիկանության կիբերհանցագործությունների բաժինը, ապրանքները վաճառվում էին հայտնի GHD, Ugg, Tiffany և Nike բրենդների անունների ներքո և դրանց մատչելի գները տեսնելով՝ գնորդները հրապուրվում էին: Այս մասին գրում է BBC-ին:

Ոստիկանությունը հայտնել է նաև, որ այդ կայքերն ընդունում էին գնորդների վճարումները և ոչինչ չէին ուղարկում գնորդներին, և, որ բազմաթիվ կայքեր ստեղծված են եղել կիբերհանցագործների կողմից՝ մարդկանց բանկային տվյալների հափշտակման նպատակով:

Այս հանցագործներին գտնելու համար, ոստիկանության աշխատակիցները կապվել են կայքերի դոմեն վաճառողների հետ և ապա արգելափակել դոմեններն ու դադարեցրել այդ կայքերի գոյությունը: Ըստ ոստիկանության աշխատակցի, նման կեղծ կայքերի հետաքննությունը շարունակվելու է մինչև Սուրբ Ծնունդ, քանի որ հենց այս շրջանում են հատկապես ակտիվանում վեբ-խանութները:

Ոստիկանությունը զգուշացնում է բոլոր գնորդներին՝ էլեկտրոնային որևիցե գնում կատարելիս անպայման ստուգել կայքի վարկանիշը և վստահելիությունը, ապա միայն կատարել գնում:

Նշենք, որ 2010-ին Լոնդոնի ոստիկանությունը հայտնաբերել էր նման 1800 կայք և դադարեցրել դրանց գոյությունը: