Վայոց Ձորում վերաբացվել են մարզի 3 համայնքների` Եղեգնաձոր քաղաքի փոստային մասնաճյուղի և 01 փոստային բաժանմունքի, Մալիշկա գյուղի և Վայք քաղաքի 01 փոստային բաժանմունքները, տեղեկացնում են «Հայփոստ» ընկերությունից: Բացման արարողությանը ներկա են եղել Վայոց Ձորի մարզպետ Սերգեյ Բագրատյանը, Վայքի քաղաքապետ Հարություն Սարգսյանը, «Հայփոստ թրասթ մենեջմենթ»-ի հավատարմագրային կառավարիչ Խուան Պաբլո Գեչիջյանը, «Հայփոստ»-ի ղեկավարությունը, ինչպես նաև տեղի բնակիչներից:
Այս բաժանմունքներում նորացվել են աշխատանքային ստանդարտները, փոխվել և նորացվել են ենթակառույցները, տեղադրվել են արդի ծրագրերին համապատասխանող նոր համակարգիչներ, նորացվել է մալուխային համակարգը և այլն:
«Հայփոստ Թրասթ Մենեջմենթ»-ի գլխավոր տնօրեն Խուան Պաբլո Գեչիջյանը նշել է, որ շենքը վերանորոգողն ու նորացնողը Հայփոստն է, սակայն ոգին ներդնում են աշխատակիցներն ու այնտեղ հաճախող բնակիչները:
«Հայփոստ»-ի բաժանմունքների վերանորոգման ծրագիրն իրականացնում է «Հայփոստ» ընկերության հավատարմագրային կառավարիչ «Հայփոստ Թրաստ Մենեջմենթ»-ը։
Մինչև տարեվերջ նախատեսվում է վերաբացված բաժանմունքների թիվը հասցնել 104-ի` ինչպես Երևանում, այնպես էլ` հանրապետության մարզերում: