Ընդդիմադիր «Ժառանգություն» և ՀՅԴ կուսակցությունները ցանկանում են քաղաքական դիվիդենտներ ստանալ՝ պահանջելով անցնել 100-տոկոսանոց համամասնական ընտրակարգի: Այդ մասին Երևանում կայացած մամուլի ասուլիսում հայտարարել է Հայաստանի Քրիստոնյա-դեմոկրատական միության ղեկավար Խոսրով Հարությունյանը: Ըստ նրա, այդ մասին է վկայում այն, որ նրանք հայտարարությամբ հանդես եկան ոչ թե Ընտրական օրեսնդրության ընդունոմից անմիջապես հետո, այլ այն ժամանակ, երբ մինչ ընտրությունները մի քանի ամիս է մնում:
Հարությունյանը նշել է, որ ամբողջապես համամասնական ընտրակարգը 100-տոկոսանոց երաշխիք չի տալիս, որ ընտրակեղծիքներ չեն լինի: Նա նշել է, որ կեղծքիներ են թույլ տալիս ոչ միայն մեծամասնական կարգով ընտրվող թեկնածուները, և ոչ միայն իշխանամետ, այլ նաև ընդդիմադիր:
Հայաստանի ԱԺ բաղկացած է 131 պատագամավորներից, որոնցից 41-ն ընտրվում է մեծամասնական, 90-ը` համամասնական համակարգով:
Ընդդիմադիր «Ժառանգություն» և ՀՅԴ կուսակցությունները դեկտեմբերի 27-ին համատեղ հայտարարությամբ են հանդես եկել` կոչ անելով իշխանություններին արգելել մեծամասնական ընտրահամակարգը և անցնել 100-տոկոսանոց համամասնական ընտրահամակարգին: Այս նախաձեռնությանն իրենց աջակցությունն են հայտնել ՀԱԿ-ը և մի շարք այլ ընդդիմադիր ուժեր:
