Հայոց ցեղասպանության ժխտումը քրեականացնող օրինագծի ճակատագիրը Ֆրանսիայի նախագահ Նիկոլյա Սարկոզիի ձեքում է: «Սարկոզին կարող է ստորագրել օրինագիծը նույնիսկ այն դեպքում, եթե Սահմանադրական դատարանը օրինագիծը համարի ոչ սահմանադրական»,- PanARMENIAN.Net-ի թղթակցի հետ զրույցում հայտարարել է Հայ Դատի Փարիզի գրասենյակի ղեկավար Հրաչ Վարժապետյանը:

Եթե Սարկոզին ստորագրի օրինագիծը մինչ Սահմանադրական դատարանի որոշումը, այդպիսով իսկ անուղղակիորեն կխոչընդոտի նրա քննարկմանը դատարանում, սակայն, Ֆրանսիայի նախագահը դեռևս լռում է:

Այսօր հայտնի է դարձել, որ սենատորները մտադիր են դիմել Սահմանադրական դատարան, բողոքարկելու համար օրինագիծը: Ինչպես հայտնել է Հրաչ Վարժապետյանը, նրանց թիվը հասել է 72-ի:

«Եթե նախագահը չստորագրի օրինագիծը և եթե Սահմանադրական դատարանի որոշումը բացասական լինի, այն կվերադարձվի քննարկման ԱԺ»,-ասել է Վարժապետյանը:

Հունվարի 23-ին Ֆրանսիայի Սենատը կողմ է քվեարկել ցեղասպանությունների,այդ թվում` Հայոց ցեղասպանության ժխտումը քրեականացնող օրինագծին: Ընդհանուր առմամաբ քվեարկել են 213 սենատորներ, որոնցից 127-ը «կողմ», 86-ը «դեմ»: Օրինագիծը մերժման համար նախատեսում է 1 տարվա ազատազրկում և 45 հազար եվրո տուգանք:

Թուրքիան շատ ցավագին արձագանքեց օրինագծի ընդունմանը՝ հայտարարելով, թե կսառեցնի համագործակցությունը Ֆրանսիայի հետ ամենատարբեր ոլորտներում:

Օրինագծի ընդունման դեպքում Թուրքիայի իշխանությունները սպառնում էին Ֆրանսիայի հետ բոլոր դիվանագիտական կապերի խզումով: Ավելին, Թուրքիայի վարչապետ Ռեջեփ Թայիփ Էրդողանը հայտարարել էր, որ երբեք չի այցելի Ֆրանսիա, եթե օրինագիծը ընդունվի: