Փետրվարի 18-ին Երևանի պետական համալսարանում տեղի է ունենալու դպրոցականների չորրորդ ամենամյա օլիմպիադան: Օլիմպիադայի նպատակն է նպաստել աշակերտների մասնագիտական կողմնորոշմանը, ծանոթացնել նախընտրած ֆակուլտետներին:
«ԵՊՀ օլիմպիադա-2012»-ը նախատեսվում է 12-րդ դասարանի աշակերտների համար: Ըստ առարկաների` յուրաքանչյուր դպրոցից կարող է մասնակցել 2-3 աշակերտ: Օլիմպիադայի տևողությունը 4 ժամ է:
Օլիմպիադան կանցկացվի «մաթեմատիկա», «ֆիզիկա», «քիմիա», «ինֆորմատիկա», «կենսաբանություն», «աշխարհագրություն», «հայ ժողովրդի պատմություն», «մարդու իրավունքներ և ժողովրդավարություն», «հայոց լեզու և գրականություն», «ռուսաց լեզու», «անգլերեն», «գերմաներեն», «ֆրանսերեն», «ստեղծագործական աշխատանք և հայ եկեղեցու պատմություն» առարկաներով:
«ԵՊՀ օլիմպիադա-2012»-ին մասնակցում են շուրջ 2400 դպրոցականներ մայրաքաղաքի, մարզերի մի շարք դպրոցներից: ՀՀ մարզերի դպրոցականները օլիմպիադային կմասնակցեն իրենց մարզկենտրոններում:
Յուրաքանչյուր առարկայի համար կազմվել է հանձնաժողով, որի նախագահները համապատասխան ֆակուլտետների դեկաններն են:
«ԵՊՀ օլիմպիադա-2012»-ի փակման և պարգևատրման արարողությունը տեղի կունենա մարտի 2-ին, հայտնում է ԵՊՀ մամլո ծառայությունը: