Մի խումբ ամերիկյան սենատորներ Պենտագոն են դիմել Աֆղանստանի համար ռուսական ուղղաթիռների գնման վերաբերյալ Ռոսօբորոնէքսպորտի հետ կնքված գործարքը խզելու առաջարկով ՌԴ կողմից Սիրիային զենքի շարունակական մատակարարման պատճառով: Այդ մասին հաղորդում է Associated Press-ը:
Դիմումի հեղինակներն իրենց դժգոհությունն են հայտնել այն փաստի առթիվ, որ կնքված գործարքների գումարները ստանում է «մի կազմակերպություն, որը, ըստ էության, հանցակից է չարագործություններին Սիրիայում»` նկատի ունենալով Բաշար Ասադի կառավարությանը զենքի մատակարարման վերաբերյալ Ռոսօբորոնէքսպորտի գործող պայմանագրերը:
Սենատորների կարծիքով` ամերիկյան հարկատուները, ում հաշվին փաստացիորեն վճարվում է ուղղաթիռների դիմաց, չպետք է «այնպիսի դրության մեջ հայտնվեն, երբ նրանք անուղղակիորեն ֆինանսավորում են Սիրիայի քաղաքացիների զանգվածային սպանությունները»:
Ընդհանուր առմամբ դիմումի տակ ստորագրել են 17 ամերիկյան սենատորներ: