ՀՀ առողջապահության նախարար Անահիտ Ավանեսյանը հայտնել է, որ ձյան պատճառով ընկնելու հետևանքով վնասվածք ստացած անձանց բուժօգնության ծախսերը կփոխհատուցվեն պետական պատվերի շրջանակում։ Նա այդ մասին հայտնել է ֆեյսբուքյան իր էջում։

«Այս օրերին առատ ձյան պատճառով մեծացել է ընկնելու հետևանքով վնասվածքներ ստանալու ռիսկը: Տեղեկացնում ենք, որ որոշում ենք կայացրել նման դեպքերի բուժման հետ կապված ծախսերը փոխհատուցել պետական պատվերի ծավալով` անկախ սոցիալական կարգավիճակից: Զգույշ և զգոն եղեք»,- գրել է նախարարը։

Առատ ձյունը լուրջ դժվարություններ է առաջացրել մայրաքաղաքում։ Փետրվարի 20-ի երեկոյան փողոցներում երթևեկությունը գրեթե կանգ էր առել, ինչը խցանումների ու վթարների է հանգեցրել։ Ձյան տեղումները կշարունակվեն նաև փետրվարի 22–ին և 23–ին։