ՀՖՖ նախագահ. Կապառոսը կշարունակի աշխատել մինչև պայմանագրի ավարտը

PanARMENIAN.Net - Հայաստանի ֆուտբոլի ազգային հավաքականի գլխավոր մարզիչ Խոակին Կապառոսը կշարունակի աշխատել մինչև պայմանագրի ավարտը, և հետագա ընթացքը դեռ քննարկման փուլում է։ Այդ մասին տարեկան ամփոփիչ ասուլիսում հայտարարել է ՀՖՖ նախագահ Արմեն Մելիքբեկյանը։

«Խոակին Կապառոսը պայմանագիր ունի մինչև 2022 թվականի դեկտեմբերի 1-ը և դեռ քննարկում չունենք, թե ինչ է լինելու դրանից հետո, քանի որ վիճակահանությունը նոր է եղել, դեռ կունենանք ևս մեկ քննարկում գլխավոր մարզիչի հետ, կհասկանանք առաջիկա տարվա ընկերական հանդիպումները և կորոշենք հետագա անելիքները։ Դեռ պայմանագիրը ուժի մեջ է և կշարունակենք Խոակին Կապառոսի հետ աշխատել մինչև պայմանագրի ավարտը»,- ասել է ՀՖՖ նախագահը, տեղեկացնում է Panorama.am-ը։

Մելիքբեկյանը նշել է, որ բոլորի համար ֆուտբոլի ազգային հավաքականի խաղը տարվա ընթացքում երկու հավասար մասերի բաժանվեց՝ գարնանային, երբ երեք խաղերում և ընկերական հանդիպումներում եղան փայլուն հաղթանակներ և աշնանային հատվածը, երբ եղան պարտություններ և ոչ ոքիներ։

Նա նկատել է, որ գարնանային հաղթանակները մեծացրին ազգային հավաքականից ակնկալիքների նշաձողը, դրա պատճառով էլ աշնանային պարտություններից մեծ հիասթափություն արձանագրվեց ֆուտբոլասերների մոտ:

Մելիքբեկյանն առաջարկել է թիմի խաղը գնահատել մրցաշարի ընթացքում հավաքած 12 միավորով, որը ՀՀ ֆուտբոլի ազգային հավաքականի պատմության մեջ երկրորդ նման բարձր արդյունքն էր:

Անդրադառնալով Ազգերի Լիգայի առաջիկա մրցաշարին ՀՀ հավաքականի մասնակցության հարցին՝ Մելիքբեկյանը նկատել է, որ բարդ մրցաշար է սպասվում, քանի որ ՀՀ-ն ընդգրկվել է ոչ այնքան հեշտ խմբում։

«Բարդ մրցակիցներ ունենք և խնդիրը Բ լիգայից հաջողությամբ դուրս գալն է։ Կարծում եմ, մրցունակ կլինենք այս խմբում»,- ասել է Մելիքբեկյանը։

Խոսելով ֆուտբոլի բարեփոխումների մասին՝ նա հայտնել է, որ հաջորդ տարում մի քանի մարզերում նոր մարզադաշտեր կշահագործվեն, որոնք կնպաստեն հայկական ֆուտբոլի զարգացմանն ու մասսայականացմանը։