Կոնջորյան. Չի ստացվելու զավթել իշխանությունը, անկախ նրանից՝ ինչ տեսքով կգան՝ մի օր փողկապով, մի օր վեղարով

PanARMENIAN.Net - ԱԺ «Քաղաքացիական պայմանագիր» խմբակցության ղեկավար Հայկ Կոնջորյանն, անդրադառնալով վարչապետ Նիկոլ Փաշին յան ի հրաժարականի պահանջներին և ծավակվող անհնազանդության ակցիաներին, ասել է, որ «չի ստացվի զավթել իշխանությունը, անկախ նրանից՝ ինչ տեսքով կգան»։

«Չի՛ ստացվելու զավթել իշխանությունը՝ անկախ նրանից ինչ տեսքով կգան՝ մի օր փողկապով, մի օր վեղարով»,–ասել է նա, հայտնում է Factor.am-ը։

Նա ասել է, որ իրենք ժողովրդի տված մանդատով ձևավորված մեծասմանություն են, Նիկոլ Փաշինյանը ժողովրդի տված մանդատով ընտրված վարչապետ է և ուստի մտադիր չեն որևէ հարց քննարկել «Տավուշը հանուն հայրենիքի» շարժման կամ այն առաջնորդող Տավուշի թեմի առաջնորդ, Բագրատ սրբազանի հետ։

«Չկա նման օրակարգ մեր թիմում»,–ասել է նա՝ խոսելով վարչապետի հրաժարականի մասին, որի պահանջը նախօրեին առաջ էր քաշվել Հրապարակում հանրահավաքի ժամանակ։

«Տավուշը հանուն հայրենիքի» շարժումը, որը դեմ է հանդես գալիս Տավուշում մեկնարկած հատվածական սահմանազատմանը, և որի երթը դեպի Երևան առաջնորդում էր ՀԱԵ Տավուշի թեմի առաջնորդ Բագրատ սրբազանը մայիսի 9-ին հասել է մայրաքաղաք, որտեղ բազմամարդ հանրահավաք է անցկացրել Հանրապետության հրապարակում։

Բագրատ սրբազանը, ընդդիմադիր պատգամավորների հետ խորհրդակցելուց հետո, դիմելով հանրահավաքի մասնակիցներին, հայտարարել է, որ առաջիկա օրերին Ազգային ժողովում նախաձեռնվելու է վարչապետին անվստահություն հայտնելու գործընթաց։