Ալեքսանդր Իսկանդարյանը գտնում է, որ Ֆրանսիան իր վրա չի վերցնի առաջնորդությունը Մինսկի գործընթացում

 19 հոկտեմբերի 2011 - 14:43 AMT

PanARMENIAN.Net - «Այն, որ Ռուսաստանը բավական ակտիվ է Մինսկի գործընթացում, կապված չէ նրա հետ, որ ԵԱՀԿ ՄԽ մյուս համանախագահներ Ֆրանսիան և ԱՄՆ-ը չեն ուզում ակտիվացնել իրենց գործունեությունն այդ գործընթացում»,- Երևանում կայացած մամլո ասուլիսում հայտնել է Կովկասի Ինստիտուտի տնօրեն Ալեքսանդր Իսկանդարյանը: «Ռուսաստանն ինքնուրույն չի ակտիվանում, նա քարտ-բլանշ ունի Միացյալ Նահանգներից և Ֆրանսիայից»,- ասել է նա: Նրա խոսքով, դա տեղի է ունեցել ռուս-վրացական հակամարտությունից հետո: «Բոլորովին ակնհայտ է, որ Մոսկվայի համար ռուս-վրացական հակամարտությունից հետո այդ տարածաշրջանում աշխատելն ավելի հեշտ է, քան ֆրանսիացիներին և ամերիկացիներին»,- նշել է հայ փորձագետը` հավելելով, որ դա հասկանում են և' Փարիզում, և' Վաշինգտոնում: Նրա խոսքով` հենց այդ պատճառով էլ Ռուսաստանն այժմ համանախագահների անունից բավական ակտիվ տեղ է զբաղեցնում այդ տարածաշրջանում: Այս համատեքստում, գտնում է քաղաքագետը, մոտ ապագայում իրադրությունը չի փոխվի: Ընդ որում, Ալեքսանդր Իսկանդարյանն ասել է, որ չի համարում, թե Ֆրանսիան իր վրա կվերցնի առաջնորդությունը Մինսկի գործընթացում: