Իրան կատարած այցի շրջանակում Մեծի Տանն Կիլիկիո կաթողիկոս Արամ Առաջինը միջեկեղեցական հանդիպում է կազմակերպել, որին ներկա էին Հռոմի Պապի դեսպանորդը, հայ կաթոլիկ և բողոքական եկեղեցիների առաջնորդները, ասորական, նեստորական և այլ եկեղեցիներից հոգևորականներ, հաղորդում է Կիլիկիո կաթողիկոսարանի մամլո դիվանը: Հռոմի Պապի ներկայացուցիչն անդրադարձել է ՀԱԵ և կաթոլիկ եկեղեցու դարավոր հարաբերություններին, ինչպես նաև հայկական եկեղեցու ակտիվ դերին միջեկեղեցական շարժման մեջ:
Նորին Սրբությունն իր հերթին սկզբում անգլերեն, ապա ֆրանսերեն լեզուներով ողջունել է քրիստոնեական եկեղեցիների հանդիպումը` որպես եղբայրության և փոխադարձ սիրո դրսևորում: Նա նշել է, որ նման հանդիպումներն ամրապնդում են նրան ընդհանուր նրանց միասնությունը, անկախ այն տարբերություններից, որոնք առկա են յուրաքանչյուր եկեղեցում: Արամ Առաջինն անդրադարձել է նաև հայ և կաթողիկե եկեղեցիների փոխհարաբերությունների հարցին` ընդգծելով, որ պետք է նոր մոտեցումներ սահմանել միջեկեղեցական երկխոսություն վարելու հարցում, որին պետք է տալ առաջնահերթությունը:
Ընդհանուր առմամբ անդրադառնալով այդ ուղղությամբ արդեն տարվող աշխատանքին` Արամ Առաջինը հայտնել է, որ գլոբալիզացիան կրոններին ուղղված մարտահրավեր է, որոնք պետք է, պահպանելով իրենց տարբերությունները, համատեղ մոտեցումներ մշակեն զանազան փոխադարձ հետաքրքրություն ներկայացնող հարցերի լուծմանը:
