«Բյուրոկրատ» գրատանը նախօրեին տեղի է ունեցել «Orange Գրքի մրցանակ 2011» մրցույթում հաղթող ճանաչված ստեղծագործությունների` արդեն հրատարակված չորս գրքերի շնորհանդեսը` Նարինե Կռոյանի «Շների համաստեղությունը» Վիոլետ Գրիգորյանի «Կամուրջ դեպի Տանյան` արտասովոր բանաստեղծն ու կինը», Տաթև Դերզյանի «Ֆուտբոլի գնդակի երազանքը» և Վահրամ Մարտիրոսյանի «Չարենց»-ը:
« Մենք այս ընթացքում արեցինք հնարավորը` հանրային ընթերցանությունների, քննարկումների միջոցով խթանելու հետաքրքրությունը ընթերցանության նկատմամբ»,– Orange-ի տարածած մամուլի հաղորդագրության համաձայն ասել է ընկերության գլխավոր տնօրեն Բրունո Դյութուան:
Մրցույթին մասնակցել են հայերենով ստեղծագործող անձինք, ովքեր ներկայացրել են նախկինում չհրատարակված գրական երկ և մշտապես բնակվում են Հայաստանում: Մրցույթին ընդհանուր թվով մասնակցել է 130 ստեղծագործություն: Յուրաքանչյուր ժանրում հաղթող ճանաչված ստեղծագործությունը հրատարակվել է առանձին գրքով, 500 տպաքանակով:
