«ՆԱՏՕ-ի հետ ընդլայնված համագործակցության իրականացման համար Հայաստանը պետք է համապատասխանի անհրաժեշտ քաղաքական չափանիշներին»,- «Մեդիամաքս» գործակալությանը տված հարցազրույցում հայտարարել է Գերման Մարշալի ամերիկյան հիմնադրամի տրանսատլանտյան հարցերով ավագ վերլուծաբան Ռոնալդ Ասմուսը: Նրա խոսքերով` առավելություններից մեկը, որն ունի ՆԱՏՕ-ն 90-ականների սկզբի համեմատ, Դաշինքի կողմից ձեռք բերված փորձն է` Հայաստանի նման երկրների հետ հարաբերությունների կառուցման համար գործիքների եւ ծրագրերի օգտագործման առումով: Ավելին, ՆԱՏՕ-ն այնպես է նախագծել իր ծրագրերը, որ գործընկեր-երկրները կարող են ինքնուրույն ընտրել համագործակցության ընթացքը եւ ծավալը, նշել է Ռ.Ասմուսը: «Հայերն իրենք պետք է որոշեն, թե ինչ հարաբերություններ են նրանք ցանկանում ունենալ ՆԱՏՕ-ի եւ Ռուսաստանի հետ»,- ասել է ամերիկյան փորձագետը: Նշենք, որ Ռ.Ասմուսի կարծիքով` «հայ-թուրքական մերձեցումը կօգնի խորացնել ՆԱՏՕ-Հայաստան հարաբերությունները»: