«Թուրքիայում գոյություն ունի սխալ պատկերացում Լեռնային Ղարաբաղի, Ադրբեջանի ու Հայաստանի փոխհարաբերությունների մասին»,- հայտարարել է Հայաստանի արտգործնախարար Վարդան Օսկանյանը թուրքական «Զաման» թերթին տված հարցազրույցում: «Այս հարցում գլխավորն այն է, որ Ղարաբաղի հայերը պայքարում են հանուն անկախության: Նրանք չեն ցանկանում լինել Ադրբեջանի քաղաքացիներ եւ գտնվել նրա կազմում», - ասել է նա: Անդրադառնալով հակամարտության կարգավորման գործում Թուրքիայի միջնորդական առաքելությանն առնչվող հարցին` Վ. Օսկանյանը հաղորդել է, որ մեր երկիրը չի կարող համաձայնել դրան, քանի որ պաշտոնական Անկարան, լինելով Ադրբեջանի դաշնակիցը, ամենուրեք եւ ամեն ինչում սատարում է այդ երկրին: Նա հիշեցրել է, որ Լեռնային Ղարաբաղը միշտ եղել է հայկական տարածք, իսկ «ինչ վերաբերում է «գրավյալ շրջաններին», ապա այդ հարցն իրար միջեւ պետք է կարգավորեն Ղարաբաղն ու Ադրբեջանը», - հայտարարել է Հայաստանի ԱԳՆ ղեկավարը: