Հայոց ցեղասպանության 90-րդ տարեդարձի շրջանակներում այս օրերին Երեւանում է գտնվում Սիրիայի ցեղախմբերի 12 աշիրեթապետերի պատվիրակությունը, որոնք մեծ հեղինակություն են վայելում Սիրիայի Արաբական Հանրապետությունում: Անցյալ դարի սկզբին աշիրեթապետերի հայրերը ապաստան են տրամադրել ցեղասպանությունից փրկված հայերին: Այսօր պատվիրակության անդամները մամուլի ասուլիս են անցկացրել, որտեղ հիացմունք են հայտնել հայ ժողովրդի մշակույթի, գիտության եւ հյուրընկալության կապակցությամբ, տեղեկացնում է «Երկիր» թերթը: Ամբողջ աշխարհը պետք է ճանաչի Հայոց ցեղասպանությունը, նշել են աշիրեթապետերը` ավելացնելով, որ իրենց երկրի ամեն թիզ հողը վկայում է այդ հանցագործության զոհերի տանջանքների մասին: Հյուրերն այցելել են Ծիծեռնակաբերդում ցեղասպանության զոհերի հուշահամալիր, Երեւանի պետական համալսարան, հանդիպումներ են անցկացրել Հայաստանի պաշտոնատար անձանց հետ: