Հայաստանը մտադիր է մինչեւ ընթացիկ տարվա վերջ ավարտել բոլոր օրենսդրական բարեփոխումները: Այս մասին ԵԽԽՎ նախագահ Ռենե Վան դեր Լինդենի հետ Սանկտ Պետերբուրգում հանդիպման ժամանակ հայտարարել է Հայաստանի խորհրդարանի նախագահ Արթուր Բաղդասարյանը, տեղեկացնում է ՀՀ ԱԺ մամուլի ծառայությունը: Նրա խոսքերով` ներկայումս Հայաստանում իրականացվում են ընտրական եւ սահմանադրական բարեփոխումներ, մասնավորապես, մարդու իրավունքների, տեղական ինքնակառավարման, ինչպես նաեւ դատական եւ գործադիր իշխանությունների ոլորտներում: Ռենե Վան Դեր Լինդենն իր հերթին ողջունել է Հայաստանում իրականացվող բարեփոխումները եւ նշել է, որ գործընթացը պետք է շարունակել Վենետիկի հանձնաժողովի հետ համատեղ եւ եվրոպական չափանիշներին համապատասխան: Հանդիպման ընթացքում կողմերը նաեւ նշել են Հայաստանի եւ Հոլանդիայի միջեւ միջխորհրդարանական կապերի կարեւորությունը, որի առնչությամբ Ա.Բաղդասարյանը հրավիրել է ԵԽԽՎ նախագահին Հայաստան: Ռենե Վան Դեր Լինդենն հրավերն ընդունել է: